Հարկերի Arevik, բարև Ձեզ: Հորմոնալ հակաբեղմնավորիչի ընտրությունը խիստ անհատական է, կախված օրգանիզմի առանձնահատկություններից, հորմոնալ վիճակից, ուղեկցող հիվանդություններից և այլն: Հորմոնալ հակաբեղմնավորիչները նշանակվում են միայն գինեկոլոգի կողմից և նրա հսկողության տակ:

Հարգելի Amalya, բարև Ձեզ: Եթե բուժումն ուղղված է եղել դաշտանային ֆունկցիայի կարգավորմանը, ապա այո կարող է սկսվող դաշտանի նշան լինել:  

Հարգելի Eva, բարև Ձեզ: Հայցում ենք Ձեր ներողամտությունը հարցին ուշ պատասխանելու համար: Հավանաբար բժիշկը ի նկատի է ունեցել, որ հղիության 6-րդ շաբաթում պտղի չափերը չեն համապատասխանում նորմային, որի համար և նշանակվել է համապատասխան դեղորայք: Դա չի նշանակում, որ անպայման կկորցնեք երեխային: Բուժում ստանալուց հետո, նշված ժամկետում հարկավոր է նորից անցնել ՈՒՁՀ հետազոտություն: Դուք նշել եք նաև դեղին մարմնի մասին, խնդրում եմ մանրամասնեք, հարցից անհասկանալի է ինչ ի նկատի ունեք: 

Հարգելի Լիլիթ, բարև Ձեզ: Հեշտոցի քսուքը ցանկալի է հանձնել դաշտանային ցիկլինի 4-5 օրերի ընթացքում, ոչ հաճախ նաև դաշտանից անմիջապես առաջ: Այո հնարավոր է, որ դաշտանից առաջ և հետո հանձնած քսուքների պատասխաններն ունենան որոշ տարբերություններ, սակայն ոչ էական: 

Հարգելի Anush, բարև Ձեզ: Ձեր դեպքում կարևոր է ձվարանի կիստայի տեսակը, ֆոլիկուլյար կամ դեղին մարմնի կիստայի դեպքում, որոնք այլ  կերպ կոչվում են ֆունկցիոնալ կսիտաներ, կոնսերվատիվ բուժումն արդյունավետ է, սակայն դերմոիդ կիստաների դեպքում բուժման միակ տարբերակը վիրահատական միջամտությունն է: Քանի որ ՈՒՁՀ հետազոտությամբ  կիստայի տեսակը պարզել հնարավոր չէ, սկսվում է դեղորայքային բուժում, որի անարդյունավետության դեպքում, նոր որոշվում է, կարիք կա վիրահատական միջամտության. թե ոչ: Եթե կիստան դերմոիդ է, այն դեղորայքով չի բուժվի, և քանի որ կարող է ճնշել ձվարանի հյուսվածքին կարող է առաջանալ նաև դաշտանի խանգարում, որը միայն դեղորայքային բուժմամբ դժվար թե վերականգնվի: Ֆունկցիոնալ կիստաների դեպքում բուժումը երկարատև է, և բուժման ընթացքում հարկավոր է անընդհատ ՈՒՁՀ հսկողություն, պարզելու համար կա դրական դինամիկա, թե ոչ: Եթե կիստան ֆունկցիոնալ է դեղորայքային բուժման ֆոնի վրա այն չափերով կփոքրանա և դաշտանային ֆունկցիան կվերականգնվի, եթե ոչ առաջին, ապա երկրորդ ամսվա ընթացքում: Քանի որ երկար ժամանակ ունեցել եք դաշտանի խանգարում, հաջորդ դաշտանի օրը դեղորայքային բուժումից հետո, կարող է չհամընկնել նախկին օրվա հետ: Դեղորայքային բուժման նշանակված կուրսն ընդունելուց հետո, անկախ նրանից դաշտանը վերականգնվել է թե, ոչ հարկավոր է նորից դիմել գինեկոլոգի և անցնել ՈՒՁՀ,  պարզելու համար կա դրական դինամիա, թե ոչ:

Հարգելի Gaya, բարև Ձեզ: Վեց ամիս կանոնավոր սեռական կյանքով ապրելու պայմաններում, հղիության բացակայությունը անհանգստացնող չէ: Ինչ վերաբերում է դաշտանային ցիկլին, ցիկլի տատանումը 3-4 օր-ով շեղում չի համարվում: Բոլոր դեպքերում գինեկոլոգի հսկողությունը ցանկալի է:

Հարգելի Amalya, բարև Ձեզ: Կանդիդոզը հարուցվում է Կանդիդա կոչվող խմորասնկով, որը հեշտոցի նորմալ միկրոֆլորայի մաս է կազմում: Միկրոֆլորայի խախտման հետևանքով հեշտոցում սկսում են բազմանալ սնկերը: Հեշտոցի կանդիդոզը շատ ավելի հաճախ է հանդիպում, քան այլ սեռական օրգաննների սնկային ախտահարումները: Սեռական օրգանների բորբոքումների դեպքում դաշտանային ֆունկցիայի խանգարում կառաջանա, եթե բորբոքմա օջախը կամ ինֆեկցիան ձվարաններում կամ արգանդի խոռոչում են: Սնկային կոլպիտի դեպքում դաշտանի ֆունկցիայի խանգարում չի կարող լինել: Հնարավոր է Ձեզ մոտ կա հորմոնալ խանգարում, հարկավոր է հետազոտվել: Այո կա դաշտանային ֆունկցիան կարգավորող դեղորայք, որը նշանակվում է միայն գինեկոլգի կողմից, համապատասխան հետազոտություններից հետո:

Հարգելի M.A, բարև Ձեզ: Եթե նկատում եք ալերգիա, հատկապես եթե գիտեք կոնկրետ ինչից է ալերգիան, հարկավոր է դադարեցնել ալերգենի հետ շփումը: Եթե ալերգիան սննդային է, բացառեք Ձեր սննդակարգից տվյալ սննդատեսակը, եթե ալերգիա առաջացնում են շրջապատի որոշ գործոններ, խուսափեք դրանց հետ շփումից: Հակաալերգիկ դեղորայքի ընդունումը հղիության ընթացքում, հատկապես առաջին եռամսյակում ցանկալի չէ, դրանք կարող են ազդել պտղի նորմալ զարգացման վրա, ծայրահեղ դեպքում նշանակվում են միայն ալերգոլոգի կողմից: Եթե կնկատեք, որ ալերգիան սրվում է հարկավոր է անպայման դիմել ալերգոլոգի:

Հարգելի gaxnik e, բարև Ձեզ: Ձեր հարցն անհասկանալի է, նկատի ունեք, դաշտան սովորաբար տեսնում եիք 4 օր, բայց վերջին ժամանակները 3 օր եք տեսնու°մ, դա անհանգստանալու առիթ չէ: Ինչ վերաբերում է շատ ուտելուն, դա ևս խնդիր չէ, եթե այլ ախտանիշներ չեն ուղեկցում, օրինակ սրտխառնոց, գլխապտույտ, քաշի նվազում և այլն: Խնդրում եմ ավել հստակ գրել, կփորձենք օգնել Ձեզ;

Հարգելի Alla, բարև Ձեզ: Ֆոլիկուլյար կիստաներն առաջանում են հորմոնալ խանգարումների հետևանքով, քանի որ դաշտանային ֆունկցիան ունի կարգավորման մի քանի մակարդակներ, ասել թէ խանգարումը կոնկրետ որ մակարդակում է խանգարումը, նաև թե կոնկրետ որ հորմոնի քանակն է խախտված դժվար է ասել: Դա որոշվում է մանրամասն հավաքված անամնեզի և լաբորատոր քննությունների արդյունքում: Նման դեպքերում ճիշտ դեղորայքային բուժումը դրական էֆեկտ է տալիս: Հետագայում կիստայի կրկնվելու կամ դաշտանային ֆունկցիայի խանգարման համար հստակ ոչինչ ասել հնարավոր չէ: Հնարավոր է, որ այն չկրկնվի, հնարավոր է նաև, որ ռեցիդիվներ լինեն: Հարկավոր է անընդհատ լինել բժշկի հսկողության տակ և հետևականորեն կատարել բոլոր ցուցումները:

Հարգելի ANaida, բարև Ձեզ: Ֆունկցիոնալ կիստայի կամ այլ կերպ ֆոլիկուլյար կիստայի առկայությունը վկայում է, որ ձվարանում ձվազատում տեղի չի ունենում, հետևաբար բեղմնավորում ևս չի լինի: Ֆոլիկուլյար կիստան առաջանում է հորմոնալ խանգարումների հետևանքով, հորմոնալ ֆոնը կարգավորելուց հետո դրանք սովորաբար ինքնուրույն ներծծվում է: Քանի որ արդեն սկսել եք բուժումը, հատկապես, եթե կա դրական դինամիկա, անհանգստանալու կարիք չկա, համապատասխան բուժումից հետո ձվարանների չափերը կվերադառնան իրենց սովորական չափին, ինչպես նաև կիստաները կներծծվեն: Ֆոլիկուլյար կիստայի դեպքում երբեմն կարող է առաջանալ կիստայի ոտիկի ոլորում, որը վիրահատական բուժում է պահանջում: Սակայն կիստայի փոքր չափերի դեպքում հավանականությունն ավելի քիչ է:

Հարգելի Hranush, բարև Ձեզ: Եթե հաջորդ հղիությունն ընթանում է առանց խնդիրների և արգանդի սպիիի անլիարժեքություն չի լինում, ապա ծննդաբերություն բնական ճանապարհով հնարավոր է: Ամեն ինչ կախված է հղիության, հետո նաև ծննդաբերության ընթացքից: